香港 Jenny Bakery 珍妮曲奇曾廣受旅客歡迎的，早期未有及時對商標進行查冊及註冊，同名商標先後於香港及中國被人註冊，近似名稱產品於中港時有出現。結果於2015年改名為「聰明小熊」，但顧客對新名字感覺陌生。
曾經排成個鐘都未排完的珍妮曲奇，年初因訪港強國旅客數字大減，長長人龍不再，當時老闆楊賜梅Jenny跟本刊講過，打算重推港人最愛的自家鳳梨卷，回歸本土，重新吸納香港人生意。半年後的今日，鳳梨卷依然無影，但Jenny原來今年六月，靜雞雞申請咗個新商標「聰明小熊」，究竟搞邊科？「目標係內地客，我們想我們的熊仔有自己的身份。」
Jenny的發達軌跡，吸引唔少行家爭相仿傚，以小熊餅乾名義魚目混珠。今次Jenny改名聰明小熊，原來係關商標事。Jenny話，深圳去年已經有人以「珍妮曲奇」名義，在大陸成功註冊，今年仲做埋餅，「跟我們一模一樣，更話我們找他合作，但事實不是，所以我們要分別，大陸那間珍妮，不是我們這間珍妮。」
曾打算回歸本土的Jenny，始終忘不了一直熱捧她的強國客。皆因多得呢班客仔，Jenny一日賣成五、六千罐曲奇，不知幾和味。現在連大陸都有人冒充，她立刻出手，在大陸也註冊了新商標──「聰明小熊」。今年六月，更在香港申請註冊聰明小熊，「我在大陸有這個名，在香港也一定要有。」珍妮的網頁更大翻新，實行話俾強國客仔知，聰明小熊先係正貨。現時正貨罐身，仍未印上聰明小熊新logo，但罐底就有凸紋寫明「香港製造」。
不過聰明小熊個名似乎有啲老套，究竟有咩含意？「冇咩呀，我改嘅。」生意亦沒有因為改名而上升。至於班大陸客點睇呢？大部分都話，大陸真係好多小熊曲奇，但都知道哪間是香港正店。但對個新名有咩睇法？個個都話：「沒聽過」。改完名卻無人知，真係分分鐘被人當是假貨，但Jenny就好有信心：「唔會，做餅係我做先㗎嘛。」
